Zbulohen trupat e dy pengjeve izraelite në Rripin e Gazës

Forcat izraelite kanë rikuperuar trupat e dy shtetasve izraelito-amerikanë, të rrëmbyer dhe marrë peng në Gaza gjatë sulmit të drejtuar nga Hamasi në jug të Izraelit më 7 tetor 2023, ka njoftuar ushtria izraelite.

Sipas deklaratës zyrtare, Judi Weinstein Haggai, 70 vjeçe – që ishte gjithashtu shtetase kanadeze – dhe bashkëshorti i saj Gadi Haggai, 72 vjeç, u vranë nga pjesëtarë të grupit të armatosur Brigadat e Xhihadistëve gjatë sulmit në Kibbutz Nir Oz, transmeton klankosova.tv.

Trupat e tyre u gjetën në zonën jugore të Khan Younis në Gaza dhe u sollën në Izrael për identifikim forenzik.

Aktualisht, 56 pengje vazhdojnë të mbahen nga Hamasi në Gaza, dhe të paktën 20 prej tyre besohet se janë ende gjallë.