UP akoma në grevë

Punëtorët e administratës në Universitetin e Prishtinës kanë bërë të ditur  se do të vazhdojnë grevën të paktën deri nesër.

“Në takimin e djeshëm me nënkryetarin e Këshillit Drejtues të UP-së , Leon Malazogu dhe sekretarin e UP-së na është premtuar se me 7 maj do të mbahet mbledhja e jashtëzakonshme ku do të shqyrtohet çështja e Kontratës Kolektive”, thuhet në komunikatën e sindikatës së këtyre grevistëve.

Sipas kësaj komunikate, grevistët sot janë takuar me Rektorin Ramadan Zejnullahu nga i cili kanë marrë premtime që maksimalisht do të angazhohet për realizimin e kërkesave të grevistëve.

“Pra greva vazhdon deri në vendimin e Këshillit Drejtues që do të mbahet nesër”, thuhet në këtë njoftim.

Këshilli Qendror Grevist do të vendosë për rrjedhën e ardhshme pas vendimit të dalë nga Këshilli Drejtues i UP-së.