Trazirat e Marsit: Viktimat që nuk i kujton askush (VIDEO)

Çdo 17 Mars, Naser Meha nga Mitrovica e konsideron ditëlindje të dytë tash e 20 vjet.

Atë ditë ai u pati plagosur me snajper në abdomen gjatë demonstratave të nisura pas mbytjes së tre fëmijëve nga Çabra në Ibër.

Ditën kritike ai kujton se e humbi vetëdijen nga lëndimet e rënda që mori.

Sfidave u mbijetoi edhe pse ende ndjen barrën e dhimbjes së 17 marsit 2004. Teksa vazhdon të jetë i pakënaqur që askush nga shteti nuk u mor kurrë me ta.

Hiç më rehat nuk ndihen as familjarët e viktimave, të atyre që u quajtën ‘trazirat e marsit’ në mesin e të cilëve ishte Ferid Citaku.

Për vëllain e tij Valmirin, që viziton shpesh varrin e Feridit, të rënët e marsit 2004 nuk po kujtohen veç pse janë dëshmorë të pasluftës gjë që ky vlerëson se është gabim.

Nga trazirat e marsit në krejt Kosovën u vranë 19 civilë, 11 shqiptarë e 8 serbë teksa u plagosën rreth 900 persona, gjatë dy ditëve u dogjën shtëpi e disa kisha serbe.