Thaçi në Sarajevë: Pajtimi, miqësia dhe integrimi janë e ardhmja e rajonit

Presidenti i Kosovës, Hashim Thaçi, që po merr pjesë në Samitin e Brdo-Brionit në Sarajevë, ka thënë se e ardhmja e vendeve ballkanike është bashkëpunimi i ndërsjellë dhe rruga e integrimit, njofton Klan Kosova.

“Dialogu, pajtimi, mirëbesimi, miqësia dhe bashkëpunimi dhe në fund integrimi janë e ardhmja e rajonit tonë. Duhet të përkrahim sinqerisht njëri-tjetrin që të ndërtojmë një të ardhme në të cilën të gjithë do të jemi të barabartë dhe do të punojmë së bashku, që sa më parë të bëhemi pjesë e NATO-s dhe e BE-së”, ka deklaruar Thaçi.

Thaçi pohoi se bashkëpunimi është i domosdoshëm edhe për përballimin e kërcënimeve ndaj rajonit.

“Për këto u pajtuam sot në Sarajevë, në kuadër të Samitit Brdo-Brioni, ne liderët e Kosovës, Shqipërisë, Sllovenisë, Kroacisë, Bosnje e Hercegovinës, Serbisë, Malit të Zi dhe Maqedonisë”.

“Sarajeva është vend i duhur të kujtojmë se çfarë dhembje dhe shkatërrimi sjellin armiqësitë, dhuna, radikalizmi dhe ekstremizmi i çfarëdo lloji. Prandaj, duhet të ndërtojmë një të ardhme të re, në të cilën të gjithë do të jetojmë në prosperitet dhe dinjitet”.

klankosova.tv

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.