Tërmete të shumta në Kosovë, eksperti thotë që nuk ka vend për panik (VIDEO)

Drejtori i Institutit Sizmologjik të Kosovës, Shemsi Mustafa, ka folur për rritjen e numrit të tërmeteve në vend, duke e cilësuar këtë si një dukuri normale për një zonë sizmike si Kosova.

“Është normale që të kemi tërmete, pasi në brendësi të tokës ka lëvizje dhe rrymim. Duhet të mësohemi me këtë fakt, sepse Kosova i përket një zone sizmike relativisht të lartë”, deklaroi Mustafa.

Sipas tij, zona të ndryshme të Kosovës mund të goditen nga tërmete me magnitudë deri në 6.5 shkallë të Rihterit, njofton Klankosova.tv.

Ndër zonat më të rrezikuara ai përmendi, Istog-Pejë-Prizren, ku janë regjistruar tërmete me magnitudë deri në 6.0 shkallë.

Po ashtu zona sizmike konsiderohen edhe Ferizaj-Viti-Gjilan,  si dhe pjesa  veriore e Kosovës, tha Mustafa në emisionin “Ora Shtatë” në Klan Kosova.

Megjithatë, ai përmendi se nuk ka arsye për panik, por është e rëndësishme që qytetarët të jenë të informuar dhe të përgatitur për tërmetet që mund të ndodhin.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.