Studentët e Zagrebit marrin mesazhe urrejtjeje për shkak të udhëtimit në Beograd

Organizata studentore e Fakultetit Juridik në Zagreb njoftoi studentët se po organizon një udhëtim në Beograd, gjë që shkaktoi reagime negative në opinionin e ekstremit të djathtë, ndërsa ish-deputeti Stevo Culej ka shkruar në rrjetin social se “shpreson që do të theren si derrat”, njoftoi portalin index.hr, transmeton Klan Kosova duke cituar N1info.

Ish-deputeti Zheljko Glasnoviq, i cili së fundmi iu bashkua Partisë Kroate të të Drejtave, shkroi në Facebook me këtë rast: “Mirë se erdhët në Jugosllavinë e tretë”.

Sipas planit të udhëtimit për në Beograd, studentët do të vizitojnë Fakultetin Juridik, Skadarlinë, Shtëpinë e Luleve, Beogradin e Ri, Tregun Slavija, etj., dhe çmimi i udhëtimit prej 150 euro përfshin akomodimin në hotel, ndërsa numri i rezervimeve është i kufizuar në 500.

Organizata studentore e Fakultetit Juridik në Zagreb, në lidhje me reagimet negative për udhëtimin në Beograd, mendon se bëhet fjalë për ndërhyrje të ndryshme mediatike dhe politike lidhur me atë udhëtim studimor dhe se ndaj tyre janë bërë kërcënime, presione dhe linçim për shkak të diçkaje që duhet të jetë normale në një shoqëri moderne demokratike.

Siç është shpjeguar, studentët e Fakultetit Juridik organizojnë rregullisht udhëtime studimore dhe të tjera me qëllim shkëmbimin e përvojave, marrjen e njohurive të reja dhe të shohin se si ndërtohet profesioni i avokatit nga kolegët e vendeve të tjera.

“Ky është qëllimi parësor dhe i vetëm i udhëtimit studimor në Beograd, të cilin individët janë përpjekur ta keqpërdorin për qëllime të lira politike ditët e fundit, duke harruar se ne jemi studentë, jo politikanë. Qëndrimi ynë nuk është saktësisht i njëjtë”, theksojnë nga organizata studentore.