Skuadra suedeze që feston fitoren me vetëm një tifoz (VIDEO)

Sado që një skuadër të luajë jashtë fushe dhe sado e dobët që të jetë, gjithmonë ka një numër tifozësh që e ndjekin nëpër transferta. Por, në Suedi nuk ndodh kështu me skuadrën Gefle IF, që luan në kategorinë e parë.

Në ndeshjen jashtë fushe kundër Kalmarit ditën e mërkurë, për t’i dhënë zemër djemve të skuadrës ishte vetëm një tifoz, i cili u shpërblye me fitore nga ekipi që lufton për mbijetesë, shkruan Top Channel.

Kur mbaroi ndeshja, lojtarët iu afruan të gjithë tifozit dhe festuan bashkë me të fitoren e parë në 12 ndeshje kampionat.

“E dija që mund të isha i vetmi tifoz pasi ndeshja u zhvillua në një orar kur të gjithë janë në punë. Gjithsesi, u nisa për ta parë dhe djemtë më dhuruan një fitore”, tha tifozi për gazetën lokale “Arbetarbladet”.