“Ska ma rond se sa me lyp gjithë prej të tjerëve…”, Qytetarët në hall me mungesën e ilaçeve (VIDEO)

Mungesa e barnave nëpër klinika, është sfida e parë nëpër të cilën hasin pacientët sapo këmba iu shkel në QKUK.

Armend Podvorica i cili çdo javë e sjellë nga Podujeva të ëmën e tij për kimioterapi, ka thënë se një pjesë të terapisë po i duhet ta sigurojë nga xhepi i vet.

40-vjeçari për KIKS Kosovën tha se ato po i kushtojnë deri në 400 euro.

E për Vllaznim Halitin qe e çuditshme situata me të cilën u përballë para disa ditësh.

Derisa një ditë doli dhe e bleu ilaçin që iu kërkua nga doktori për 5 euro e 80 cent, mirëpo nuk e pati çmimin e njëjtë edhe pas 24 orësh.

Kjo sipas Halitit u bë me qëllim nga barnatoret të cilat sapo e vërejtën mungesën në QKUK, e rritën çmimin.

Këto shpenzime Haliti tha se po janë vështirë të përballueshme.

Për KIKS Kosovën ai rrëfeu se nuk po mundet as të punojë duke u kujdesur për vëllaun, andaj të afërmit po u ndihmojnë për shpenzime të spitalit.

E ndihma e të afërmve për shpenzimet e spitalit po e mundon edhe Fadil Gashin.

62-vjeçari për KIKS Kosovën tha se deri në 1000 euro në muaj po duhet të paguajnë shpenzime spitalore bashkë me të shoqen, e shton se nuk po ndihet aspak mirë që po detyrohet të kërkojë ndihmë nga të afërmit.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.