Shefi i Trafikut Rajonal në Ferizaj emërohet komandant i ri i Policisë në Lipjan

Komandanti i Trafikut Rajonal në Ferizaj, Brahim Shatrolli, është caktuar si komandant i ri i Stacionit Policor në Lipjan, në kuadër të veprimeve të ndërmarra pas rastit tragjik të 27-vjeçarit, Agon Zejnullahu.

Siç merr vesh Klankosova.tv., tashmë është lëshuar vendimi i ri që Shatrolli të shërbejë në këtë pozitë, dnërsa komandanti që ka qenë deri më tash, Argjend Gashi ka ofruar dorëheqjen e tij.

Vet Gashi e ka konfirmuar këtë zhvillim, por shtoi se akoma nuk ka një vendim se ku do të pozicionohet tash e tutje.

Pesë zyrtarë policorë, Ibrahim Nela, rreshter në Stacionin Policor Lipjan, Liridon Rrahmani, Artidon Konxheli dhe Albian Raktoceri, zyrtarë policorë të këtij stacioni, si dhe Endrit Beqiri, zyrtar në Stacionin Policor Ferizaj, u suspenduan dhe u dërguan në paraburgim për ‘vrasje nga pakujdesia’ në rastin e të riut që dyshohet se vdiq në duart e Policisë.

Sipas nenit 175 të Kodit Penal të Republikës së Kosovës, kushdo që e privon nga jeta personin tjetër nga pakujdesia, dënohet me burgim prej gjashtë muaj deri në pesë vjet burgim./Klankosova.tv

Komandanti i Policisë në Lipjan e konfirmon për Klankosova.tv: Ofrova dorëheqje, s’jam shkarkuar

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.