ShBA-ja ka kohë që mbështet rrugëtimin e Kosovës, thonë nga Ambasada

Shteti afrikan i Kenias, më 26 mars, vendosi të njohë Kosovën shtet të pavarur dhe sovran.

Ky vendim u bë i ditur nga ish-presidenti i vendit, Behgjet Pacolli, i cili edhe publikoi fotografitë nga nënshkrimi i vendimit nga presidenti i Kenias, William Ruto, raporton Klankosova.tv.

Veprimi i shtetit afrikan u prit me reagime të ashpra nga shteti serb, i cili ka kohë që ka nisur një fushatë agresive kundër shtetit të Kosovës, duke penguar njohjet e reja dhe duke tentuar të bind shtete që e kanë njohur mëvetësinë e Kosovës që ta zhbëjnë atë.

E për Shtetet e Bashkuara të Amerikës (ShBA), qasja e Serbisë nuk e ndryshon qëndrimin e tyre.

Një zëdhënës i Ambasadës së ShBA-së në Kosovë, për Klankosova.tv ka thënë se ShBA-ja ka kohë që mbështet rrugëtimin e Kosovës.

“Shtetet e Bashkuara ka kohë që kanë mbështetur rrugëtimin e Kosovës për t’u bërë vend sovran, demokratik, multi-etnik dhe me prosperitet”, ka thënë një zëdhënës i Ambasadës së ShBA-së në Prishtinë. /Klankosova.tv

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.