Shaip Kamberi vendos flamurin kuq e zi në Parlamentin e Serbisë (VIDEO)

Deputeti shqiptar, Shaip Kamberi, në fjalimin e sotëm në Kuvendin e Serbisë ka nxjerrë flamurin shqiptar duke kërkuar që të lejohet përdorimi i tij nga komuniteti shqiptar.

Ai tha se në Serbi duhet të ndryshohet ligji dhe t’iu mundësohet edhe shqiptarëve që të përdorin flamurin e tyre kombëtar duke thënë se vetëm në Serbi iu mohohet kjo e drejtë, njofton Klan Kosova.

“Flamuri shqiptar të legalizohet dhe të valojë në Luginë, ashtu sikurse po valon ligjshëm flamuri serb në Graçanicë, Kotor dhe Kumanovë”, tha Kamberi në Parlamentin e Serbisë.

Postimi i plotë:

BARAZI NË TË DREJTA, PARAKUSHT PËR PAQEN NË RAJON

Serbia mbetet i vetmi shtet në rajon që e ndalon përdorimin e simbolit kombëtar për pakicën e vet, përmes ligjit për minoritete.

Përderisa pakica kombëtare serbe përdor ligjshëm flamurin në Graçanicë, Kumanovë e Kotor; flamuri shqiptar ndalohet në Luginën e Preshevës.

Barazia nuk duhet ndërtuar duke ia ndaluar pakicave kombëtare përdorimin e simboleve të tyre kombëtare.

Prandaj sot vendosa flamurin shqiptar në parlament, krahas flamurit serb.

Ligji për minoritete duhet të ndryshohet në Serbi.

Flamuri shqiptar të legalizohet dhe të valojë në Luginë, ashtu sikurse po valon ligjshëm flamuri serb në Graçanicë, Kotor dhe Kumanovë.

Simbole të ligjshme kombëtare për çdo pakicë kombëtare në rajon, pa dallim.

Barazia në të drejta është parakusht për paqen rajonale.