Rezervoi bileta pa asnjë cent, Mërgim Gashi kthen borxhin pas hulumtimit të Kiks Kosova (VIDEO)

Disa agjenci udhëtimesh në Gjilan dhe Prishtinë u gjendën përballë një skeme mashtrimi, që dukej si e dalë nga një film: rezervime biletash të konfirmuara, udhëtime të realizuara por pagesa askund.

Një emër i vetëm, Mërgim Gashi, arriti t’i mashtrojë këto agjenci disa herë me radhë, raporton Kiks Kosova.

Ai porosiste bileta në emër të klientëve, por nuk paguante asnjë cent.

Me presionin e shtuar nga Policia, i dyshuari Gashi ia ktheu rreth 5000 euro një agjencie në Prishtinë, megjithatë jo menjëherë, dhe sigurisht jo ashtu siç i kishte marrë.

Borxhi prej 1100 eurove ndaj agjencisë në Gjilan mbeti i papaguar.

Një ditë, Gashi mori një telefonatë nga emisioni Kiks Kosova, që po hetonte rastin.

Frika dhe presioni e kapluan.

Ditë pas dite, ai filloi të dërgonte njerëz që të bindnin redaksinë për të mos e transmetuar emisionin.

Për të fituar kohë, Gashi i kërkoi dy javë Kiks Kosovës, duke thënë se do të vinte në Kosovë për të treguar versionin e tij. Por, as kjo nuk ndodhi.

Në vend të një sqarimi publik, ai zgjodhi një llogari bankare.

Pa dhënë asnjë shpjegim, Mërgimi ia ktheu 1100 eurot e agjencisë turistike në Gjilan, duke besuar se pagesa do ta ndalonte transmetimin.

Pronarja e agjencionit luti Kiksin që ta ndalej emisioni për shkak të frikës nga Mërgim Gashi.

Mërgimi i kishte premtuar Kiks Kosovës se do të vinte në Kosovë më 1 korrik, dhe ashtu siç e kishin lënë, gazetarja e kontaktoi atë.

Mirëpo Mërgimi si duket gënjeu për të përfituar kohë.

Ai tha se është i sëmurë andaj nuk e di se kur mund të vijë.

Të mërkurën (7 korrik) kur edhe do të transmetohej emisioni, Mërgim Gashi u kontaktua edhe një herë nga redaksia për t’i dhënë hapësirën.

Gashi nuk e hapi telefonin dhe as nuk e ktheu mesazhin.

Siç pretendonte ai, kishte qenë në vizitë tek mjeku dhe nuk mundi t’i kthejë përgjigje Kiksit.

Mirëpo pa kaluar as 2 minuta, Mërgimi kishte kontaktuar avokatin e tij Muharrem Kurtaj, duke i kërkuar atij që ta ndalte emisionin.

Pavarësisht se Kiksi i tregoi se një gjë e tillë nuk është e mundur, Kurtaj insistonte. Me një gjuhë të ashpër në telefon, ai akuzonte gazetaren për jo profesionalizëm, ani pse e priti Mërgimin për dy javë.

Pas transmetimit të emisionit lidhur me mashtrimet e dyshuara të Mërgim Gashit, në emailin e redaksisë erdhën dhjetëra mesazhe nga persona të cilët pretendonin se ishin mashtruar nga i njëjti person, Mërgim Gashi.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.