Real Madridi i drejtohet Prokurorisë për rastin e Viniciusit

Real Madrid ka dënuar ashpër ngjarjet e ndodhura dje kundër lojtarit Vinicius Junior, në ndeshjen ndaj Valencias.

Klubi madrilien ka bërë të ditur se rastin e ka paraqitur në Prokurorinë e Përgjithshme të Spanjës, transmeton Klankosova.tv.

“Këto ngjarje përfaqësojnë një sulm të drejtpërdrejtë ndaj modelit social dhe demokratik të bashkëjetesës së shtetit tonë të bazuar në shtetin ligjor”, thuhet në njoftim.

“Real Madrid beson se sulme të tilla përbëjnë gjithashtu një krim urrejtjeje dhe për këtë arsye ka paraqitur raportin përkatës në Prokurorinë e Përgjithshme, veçanërisht në Prokurorinë kundër krimeve të urrejtjes dhe diskriminimit, në mënyrë që të hetohen faktet dhe përgjegjësit të të mbajë përgjegjësi”.

“Neni 124 i Kushtetutës spanjolle përcakton se roli i Prokurorisë Publike është të promovojë ndjekjen e drejtësisë në mbrojtje të ligjshmërisë dhe të drejtave të qytetarëve dhe interesit publik”.

“Nisur nga serioziteti i ngjarjeve të ndodhura, Real Madridi i është drejtuar Prokurorisë së Përgjithshme, pa paragjykuar qëndrimin e tij si prokuror privat në çdo procedim që mund të nisë”.