Pse qajmë kur jemi të lodhur ose të sëmurë?

Shpesh ndodh që të keni ndonjë ditë apo javë kur ndiheni të rraskapitur dhe befas e gjeni vetën duke qarë edhe për gjëra shumë të vogla.

Kjo ndodh sepse brenda trurit tonë, emocionet e forta aktivizojnë rrjetin qendror autonom, i cili përbëhet nga sistemi simpatik që aktivizon përgjigjen tonë “lufto ose ik” kur perceptojmë rrezikun dhe sistemi nervor parasimpatik, i cili e kthen trupin në një gjendje qetësie.

Fatkeqësisht, sa më shumë të stresuar dhe të lodhur jemi, ose nëse përjetojmë periudha të zgjatura dhimbjeje fizike ose emocionale, sistemi simpatik mbetet i aktivizuar, shkruan Indianexpress, transmeton Klankosova.tv.

Truri bëhet më pak i aftë për të rregulluar emocionet tona në mënyrat e pritura, duke rezultuar në përgjigje të dukshme emocionale, të tilla si lotët ose shpërthimet e zemërimit.

Mund të mos e kuptojmë se sa të dërrmuar jemi derisa lotët të na rrjedhin pas një incidenti ose përvoje që për të tjerët mund të duket shumë e vogël.

Disa njerëz kanë më shumë gjasa të qajnë se të tjerët. Gratë priren të qajnë më shumë se burrat.

Njerëzit që kanë rezultate të larta në tiparet e personalitetit të ndjeshmërisë ose neurotizmit kanë më shumë gjasa të qajnë më shpesh. E qara e tepërt mund të jetë gjithashtu një tregues fizik i depresionit, pasi truri është i mbingarkuar me dhimbje emocionale.