Nishani rrëzon Llallën për prokurorët shtesë - Klan Kosova


Na ndiqni në:


Get it on Google Play Download on the App Store

Nishani rrëzon Llallën për prokurorët shtesë

NULL NULL
17/10/2015

Presidenti i Republikës, Bujar Nishani, ka refuzuar të dekretojë emërimin e katër prokurorëve shtesë në Njësinë Anti-korrupsion në Prokurorinë e Përgjithshme, shkruan Shekulli.

Bëhet fjalë për emërimin në krye të kësaj njësie në muajin shtator të prokurorëve Armand Gurakuqi, Anisa Qilimi, Enkelejda Minollai dhe Gent Osmani, si dhe të shefit që do t’i drejtojë ata, prokurorin Dritan Rreshka.

Me përjashtim të Osmanit, që u transferua nga Prokuroria e Elbasanit te Krimet e Rënda, katër të tjerët u votuan nga Këshilli i Prokurorisë, e më pas u emëruan nga Prokurori i Përgjithshëm në strukturën që vijon të jetë e brishtë pavarësisht pritshmërive.

Por, me sa po shikohet kjo lëvizje e Prokurorit të Përgjithshëm nuk është cilësuar e përshtatshme nga presidenti, pasi asnjëri prej katër emërimeve nuk është dekretuar prej tij. Argumenti që rrëzon Prokurorin e Përgjithshëm e që me sa duket shfaq një marrëdhënie jo të mirë mes Adriatik Llallës dhe Nishanit, thuhet në rrugë jozyrtare të jetë mosndjekja e të gjitha kritereve për këto emërimeve.

Kjo pasi për katër prokurorët, së pari duhej kryer shpallja e vendeve vakante te Krimet e Rënda e më tej ata duhet t’i nënshtroheshin konkursit.

Megjithë refuzimin e presidentit Nishani për t’i dekretuar, Prokurori i Përgjithshëm ka zgjedhur t’i qëndrojë firmës së tij, duke i lënë ata tashmë si të komanduar në këtë detyrë, çka do të thotë se aktualisht në Prokurorinë e  Krimeve të Rënda janë me pëlqim vetëm prokurori Gentian Osmani dhe prokurori amerikan Gjon Junçaj./Shekulli.