Modeli i njohur i Mianmarit dënohet me tre vjet burgim për pjesëmarrje në protestat masive

Një nga personazhet më të njohur të Mianmarit është dënuar me tre vjet burgim për pjesëmarrje në protestat masive që tronditën Mianmarin pas një grusht-shteti ushtarak në shkurtin e kaluar.

Paing Takhon, model dhe aktor me miliona fansa, mori pjesë në protestat kundër grusht-shtetit dhe gjithashtu ka qenë i zëshëm në dënimin e qeverisë në internet.

Ushtria e Mianmarit mori pushtetin pas pretendimeve për mashtrime zgjedhore.

Takhon u arrestua në prill nga rreth 50 ushtarë që mbërritën me tetë kamionë ushtarakë në orën 05:00, sipas një postimi në Facebook nga motra e tij, shkruan BBC, transmeton Klankosova.tv.

Këshilltari i tij ligjor Khin Maung Myint tha për AFP se ai ishte dënuar, duke shtuar se familja e tij po shqyrtonte nëse do të apelonte.

24-vjeçari ishte parë më parë duke marrë pjesë në disa demonstrata dhe marshime.

Ai kishte postuar gjithashtu imazhe të liderit të rrëzuar civil dhe ikonës pro-demokracisë Aung San Suu Kyi, që u dënua me katër vjet burgim për nxitje të mospajtimit dhe thyerje të rregullave të COVID-19.

Llogaria e tij në Instagram me më shumë se një milion ndjekës u mbyll menjëherë pas arrestimit të tij, së bashku me llogarinë e tij në Facebook. Megjithatë, llogaria në Instagram duket se është rikthyer nga një llogari fansash.

Një i njohur i tij i afërt, i cili nuk dëshironte të përmendej, i kishte thënë më herët BBC-së se Takhon kishte vuajtur nga depresioni dhe një gjendje fizike kur u arrestua, duke shtuar se ai as nuk mund të “qëndronte siç duhet”.

Megjithatë, ata shtuan se ai kishte qenë ‘i vetëdijshëm për pasojat’ që e prisnin, duke shtuar se ai ‘nuk ishte aspak i frikësuar’.