Minerva Group mohon se mashtroi të riun për vizë pune, por ndryshon deklaratat (VIDEO)

Kompania Minerva Group ka mohuar akuzat e Artan Mehajt për mashtrimin me vizë pune. Ata janë arsyetuar se vonesat karshi Mehajt kanë ardhur për fajin e tij, pasi ai është dashur të sigurojë terminin për vizë pune në ambasadën e Gjermanisë në Prishtinë.

Tutje përmes një përgjigjeje elektronike, zyrtarët e kësaj kompanie kanë theksuar se  kontrata e Mehajt është ende e vlefshme dhe se paratë atij i kthehen, vetëm nëse i refuzohet viza nga ambasada e Gjermanisë.

Ndryshe kanë folur për gazetarët e Kiksit, të cilët janë kamufluar si klientë potencialë për të siguruar një vend pune në Gjermani.

Në interesimin e Kiksit për këtë mundësi, zyrtarë të kësaj zyre konsulente na pranojnë se në kuadër të marrëveshjes është edhe sigurimi i terminit në ambasadën gjermane, duke përfshirë edhe sigurimin e punës dhe vendbanimit dhe atë për vetëm 150 euro.

Ata japin siguri që ambasada nuk e refuzon vizën, nëse janë të sakta të dhënat e kërkuara, duke përfshirë edhe pastërtinë para ligjit.

Pavarësisht faktit se te rasti i Artan Mehajt, kjo zyrë thoshte se fati i terminit është përmes shortit, këtë radhë na dha më shumë siguri, duke theksuar se njerëzit e tyre kanë lidhje me autoritetet gjermane dhe e kanë më të lehtë të marrin këto termine, për të cilët qytetaret presin me vite.

Kompania Minerva Group thekson se ka 10 vjet që e ushtron këtë biznes dhe që, sipas tyre, veprojnë si zyre konsulente për migrim në Gjermani dhe qëllimi i tyre është të ndihmojnë personat që kanë interes të emigrojnë në Gjermani për qëllime punësimi dhe t’u gjejnë atyre punëdhënës.