Kurti kthehet nga Bratisllava, merr pjesë në një takim ndërministror për Ditën e Fëmijëve

Kryeministri i vendit, Albin Kurti, ka vazhduar agjendën e tij në Kosovë, pas pjesëmarrjes së tij dje, në Forumin e Bratisllavës, ku edhe u takua me përfaqësues të BE-së, për situatën e tensionuar në veri.

Ai sot u pa në Prishtinë, në një takim të Komitetit Ndërministror për të Drejtat e Fëmijëve, me rastin e 1 Qershorit, transmeton klankosova.tv.

Në këtë ngjarje, teksa ka uruar Ditën e Fëmijëve, ritheksoi përkushtimin e qeverisë për të rritur mirëqenien e tyre.

Sipas tij, mirëqenia e fëmijëve nuk është vetëm obligim ligjor dhe etik por edhe gurthemel për shoqëri prosperuese.

Ai tha se të drejtat e fëmijëve janë përgjegjësi kolektive për të cilat duhet të angazhohen dhe punojnë krah për krah duke bashkuar forcat të gjitha institucionet.

Komiteti Ndërministror për të Drejtat e Fëmijëve është krijuar për të komunikuar dhe koordinuar politikat, programet dhe proceset në lidhje me çështjen e të drejtave të fëmijëve.

Ndaj dhe vepron brenda Qeverisë së Republikës së Kosovës, për të lehtësuar realizimin e të drejtave të fëmijëve dhe për t’iu ofruar atyre mundësi të barabartë për pjesëmarrje aktive në shoqëri.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.