Kryeziu tregon se kur duhet presidentja t’i drejtohet Kushtetueses për moskonstituimin e Kuvendit

Kadri Kryeziu, ish-gjyqtar i Gjykatës Kushtetuese, ka folur për situatën politike në vend të moskonstituimit të Kuvendit për muaj me radhë.

Në emisionin Info Magazine të Klan Kosovës, ai ka thënë se presidentja Vjosa Osmani mund të dërgojë pyetje në Gjykatën Kushtetuese të Kosovës, se a është shkelur Kushtetuta derisa ende nuk u formua Kuvendi.

“E kam cekur se ne duhet t’i shtjerrim mjetet politike dhe juridike të brendshme. Mjetet politike, një autoritet që ka validitet dhe është një autoritet kushtetues është presidenti. Presidentja ka detyrë kushtetuese, ligjore, kombëtare dhe njerëzore që t’i kontaktojë partitë politike dhe ta krijojë institucionin bazik të vendit tonë”.

“Kur të iu shterren mjetet politike, është vullneti politik i subjekteve nëse ato merren vesh dhe ajo bëhet me kompromis atëherë nuk ka nevojë që të kalohet në mjetet juridike”.

“Presidentja e ka në funksion të saj një mjet juridik nga neni 113, pika 3 dhe pika 5, në të cilin ka mundësi të bëjë një kërkesë në Gjykatë Kushtetuese duke e pyetur se gjatë këtyre procedurave a është shkelur Kushtetuta derisa nuk themelohet parlamenti”, ka thënë Kryeziu. /Klankosova.tv

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.