Krasniqi thotë se Trump e sheh Kosovën mes temave në mandatin e tij kurse Kurti bllokon me kryeneçësi (VIDEO)

Kryetari i PDK-së, Memli Krasniqi po e vlerëson tejet të rëndësishme qasjen e presidentit amerikan, Donald Trump i cili tha se në mes të krizave globale me konflikte, zgjodhi ta përmend Kosovën.

Ai u shpreh se ky fakt, është tejet pozitiv, megjithatë duhet menduar se si kryeneçësia e Albin Kurtit po i lë të bllokuara institucionet e vendit, transmeton klankosova.tv.

”Është i mirëseardhur fakti që presidenti Trump, për herë të parë në shumë e shumë kohë, po e përmend Kosovën. Dhe përkundër faktit që prioritetet e diplomacisë amerikane tashmë dihen që ndërlidhen me konfliktet kryesore në vend, duke përfshirë luftën mes Izraelit dhe Iranit por dhe luftën mes Rusisë dhe Ukrainës, si dhe vatra të tjera të krizës, unë e shoh pozitivisht faktin që Trump e përmend edhe Kosovën dhe e sheh si një nga temat që do të merret gjatë mandatit të tij”.

”Por para se të mendojmë për pozicionin e SHBA-së, neve na takon të mendojmë ku është Kosova sot, dhe bllokada e cila po vazhdon për shkak të kryeneçësisë së Kurtit dhe Lëvizjes Vetëvendosje është e dëmshme edhe për pozicionin e Kosovës, sepse nëse në një moment të shpejtë që nuk mund ta dimë se kur mund të jetë ai moment, ka një kërkesë nga SHBA-të për të pasë një qasje më proaktive në raport me marrëveshjen më potenciale mes Kosovës dhe Serbisë dhe nëse ne nuk kemi institucionet e konsoliduara, kjo gjithsesi që dëmton pozicionin e Kosovës”.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.