Kosova kryeqendër bote, nis Kongresi Botëror për Personat me Aftësi të Kufizuara (VIDEO)

Të enjten ka nisur punimet Kongresi Botëror për Personat me Aftësi të Kufizuara, “Bashkë për gjithëpërfshirje dhe prosperitet”.

Ambasadorja e Vullnetit të Mirë për Kosovën në IHRC, Elvana Shala, udhëtoi gati në çdo cep të botës për të përçuar zërin e  personave me aftësi të kufizuara dhe mblodhi 31 delegacione të huaja për këtë ngjarje, njofton Klan Kosova.

E Ambasadori i SHBA-së, Jeffrey Hovenier tha se duhet të hidhet poshtë narrativa që anashkalon ata duke i përjashtuar e jo duke i pranuar dhe u zotua për përkrahje.

E kryekuvendari, Glauk Konjufca, tha se pavarësisht që ka ligje për këtë kategori të shoqërisë, ato nuk zbatohen. E në emër të kryeministrit, Albin Kurti, që s’mundi të merr pjesë në kongres, foli zëvendësja e tij, Donika Gërvalla që tha se përkrahja duhet të jetë nga të gjitha institucionet.

Aty u bë e ditur se janë në procedurë të shqyrtimit në Kuvend dy projektligje shumë të rëndësishme që i rregullojnë të drejtat dhe mundësitë e personave me aftësi të kufizuara.