Korrupsioni brenda FIFA-s

FIFA ka njoftuar hapjen e një hetimi të brendshëm, rreth akuzave për korrupsion, të ngritura ndaj drejtuesve të konfederatës botërore të futbollit.

Hetimi, i cili udhëhiqet nga avokatë të jashtëm nga organizata, shkon paralelisht me atë të Byrosë Amerikane të Hetimeve, FBI, për veprimet e jashtëligjshme të kryera nga funksionarët e lartë të futbollit botëror, transmeton supersport.al.

Sipas burimeve të brendshme, vendimi i është komunikuar anëtarëve të Komitetit Ekzekutiv gjatë muajit të kaluar në Zyrih.

Në fund të muajit maj, 14 funskionarë të FIFA-s u akuzuan për korrupsion në Shtetet e Bashkuara. Mes tyre figuronin edhe zv.presidentët e institucionit, Eugenio Figueredo dhe Jeffrey Webb.

FIFA konfirmoi se ka nisur hetimin e brendshëm me qëllim për “të përmirësuar organizatën, por edhe për të treguar vullnet që të vazhdojë të përforcojë përgjegjësinë dhe udhëheqjen e futbollit”.

Në qëndrimin zyrtar nuk u dha asnjë detaj tjetër, për sa i takon hetimit paralel apo hapave që do të ndiqen më tej.