Komunarët shëtitës të Shtimes

Duket se zyrtarët e komunës së Shtimes kanë bërë punë të madhe ndaj dhe kishin nevojë për pushim. Por, për të paguar këtë vizitë ata nuk futën fare duart në xhepat e tyre.

Kjo sepse qeverisja lokale e  Shtimes pagoi 3500 euro për të dërguar punonjësit e saj në ekskursion në Shqipëri.  Fitues tenderit është kompania “Arbeni Tours” Sh.p.k, i cili në kontratë paraqitet si ofertuesi më i lirë.

Zyrtari për Marrëdhënie me Publikun në komunën e Shtimes, Lulzim Sahiti, tha se ai nuk ka informata të mjaftueshme lidhur me natyrën dhe mënyrën e financimit të vizitës. Ai poashtu tha se sipas informatave që ka, kjo vizitë është private, pra e financuar nga vetë pjesëmarrësit.

Mirëpo kjo është jashtë çdo logjike ngase për vizita private nuk hapen tenderë publik.

Muhadin Halili nga prokurimi i komunës së Shtimes, i kontaktuar nga Klan Kosova dha verzionin zyrtar lidhur me çështjen.

Sipas Halilit nuk ka asgjë të panatyrshme në hapjen e këtij tenderi për arsyet që ceken në të.

“Kjo vizitë ka qenë e programuar në buxhetin e këtij viti. Vizita të tilla për zyrtarët e komunës organizohen çdo vit.”- tha Halili për Klan Kosova.

Por, zyrtari i prokurimit të Shtimes, z.Haliti, nuk mundi të thotë dot pse duhet komuna të paguajë për të tilla vizita.

Poshtë gjeni dokumentin i cili tregon financimin e vizitës nga paratë publike dhe të gjitha modalitetet tjera të kësaj çështje.

klankosova.tv

 

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.