‘A ju kemi thënë?’ 

‘A ju kemi thënë?’ 

Nuk ka fjali më të shkurtër, më të qartë dhe më të saktë me të cilën autoritetet e Kosovës mund të ofrojnë shpjegimin e tyre për ngjarjet e kësaj të diele, me 24 tetor, në komunikimin  me politikanët dhe diplomatët perëndimor. 

Natyrisht, në fund të saj mund ta shtojnë një tjetër fjali: ‘Por ju, nuk na besonit’. S’ka kurfarë dyshimi që ajo çfarë ndodhi një ditë më parë, në fshatin Banjskë të komunës  së Zveçanit, do të ndikojë në mënyrë të ndjeshme që naracioni i Prishtinës zyrtare të fitojë  në peshë, dhe që ai i Beogradit zyrtar të pësojë një rënie të madhe.  

E naracionet në politikë mund të kenë vlerë vendimtare. Këtë e dimë të gjithë ne. Veçmas  muajve të fundit.  

Kësaj here pra, ky sulm ndaj forcave të rendit të Kosovës, i cili këtupari por edhe në  Perëndim u kualifikua njëzëri si ‘akt terrorist’ (por që lirisht do të mund të cilësohej dhe  si rebelim i armatosur, apo edhe si agresion i Serbisë mbi territorin e Kosovës), nuk solli  me vete asnjë fije dyshimi se çfarë ka ndodhur në të vërtetë.  

Situata është brutalisht e qartë, dhe ajo njeh vetëm dy ngjyra në përshkrimin dhe analizën  politike: bardh dhe zi. 

Paralajmërimet që diçka e tillë mund të ndodhë në Veriun e Kosovës, shkojnë prapa, si  këtu ashtu edhe në Perëndim, që prej ditëve të para të fillimit të luftës në Ukrainë. Dihet  pse. Pastaj, që prej majit të këtij viti e tutje, ishin shenjat evidente se në ç’drejtim mund të  destabilizohet gjendja e sigurisë në këto anë të Kosovës. Në përleshjen e grupeve radikale  serbe me ushtarët e KFOR-it, për herë të parë që nga përfundimi i luftës në Kosovë, patëm  mbi 90 trupa të KFOR-it që u lënduan lehtë dhe rëndë. Në ditët vijuese, forcat speciale  serbe kidnapuan tre polic të Kosovës, të cilët u liruan vetëm pas një presioni të madh  ndërkombëtar. Shpërthimin e bombave të ndryshme në Veri, duket se kush më nuk e  numëron që nga vjeshta e vitit të kaluar. Megjithatë, kulminacioni i kësaj fushate për ta  shndërruar Veriun e Kosovës në zonë të kërcënimeve të vazhdueshme të sigurisë, u shënua  këtë të diele me daljen në skenë të këtij grupi të armatosur deri në dhëmbë (si thuhet), me  pamjet të cilat për brezin që e mbanë në mend luftën në Kosovë, nuk ka si të mos i kujtojë  njësitë speciale serbe të cilat bënin kërdinë në të katër anën e këtij vendi. 

Me siguri, në ditët vijuese do të zbardhen shumë detale të tjera që do të dëftojnë se kush  dhe si e organizoi këtë grup, çfarë ndodhi që i gjithë operacioni mori kahjen të cilën vështirë  që e kanë dëshiruar ata që e organizuan ate, dhe mbi të gjitha, cili është roli i Serbisë në  gjithë këtë rrëfim. Sepse, askush nuk ka dyshime që kush në të vërtetë qëndron prapa këtij  zhvillimi, që risolli Kosovën në kryelajmet ndërkombëtare, pas atyre që kanë të bëjnë me  luftën në Ukrainë. 

Pesë muaj para kësaj përleshjeje të armatosur në mes të Policisë së Kosovës dhe këtij grupi  terrorist, apo, me 24 prill, Presidenti i Serbisë, Aleksandar Vuçiq, pati dalë me një  deklaratë, duke ofruar interpretimin e tij të zgjedhjeve për pushtetin lokal në katër komunat e Veriut, të cilat u karakterizuan, si dihet, me bojkotimin e tyre nga popullata lokale, i cili  u urdhërua nga ai, dhe u ekzekutua nga strukturat e tij paralele në Kosovë. Pos argumenteve të zakonshme të tij të servuara në të gjithë ‘kalibrat’ e tij politik, Vuçiq  për herë të parë, doli me një konstatim që ishte rrënqethës dhe i rrezikshëm njëkohësisht. Ai pohoi që pas këtyre zgjedhjeve, po fillon okupimi i Veriut të Kosovës, teksa populli  serb do të gjej mënyra për t’i rezistuar këtij okupimi. 

Që ky konstatim nuk ishte i rastësishën, u kuptua edhe më pas, kur jo vetëm ai, por edhe  figurat tjera kryesore të ’Listës Serbe’, e përsëritën ate. Shumë herë, madje. Nuk ka si të mos vendoset lidhja e drejtpërdrejtë në mes të këtij vlerësimi të Vuçiqit, të  thënë pesë muaj më parë, dhe ngjarjeve të djeshme në fshatin Banjskë të Zveçanit.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.