Kim Jong Un urdhëron rritjen e prodhimit të raketave për parandalim lufte

Udhëheqësi i Koresë së Veriut, Kim Jong Un, ka urdhëruar rritjen e prodhimit të raketave dhe predhave të artilerisë, si dhe ndërtimin e fabrikave të reja të municioneve, për të përmbushur nevojat në rritje të ushtrisë, raportoi agjencia shtetërore Korean Central News Agency .

Gjatë një vizite në disa fabrika të industrisë ushtarake, Kim u shoqërua nga zyrtarë të lartë dhe kërkoi që sektori i prodhimit të përgatitet për një vit intensiv. Ai theksoi se prodhimi i raketave dhe predhave është “me rëndësi parësore për forcimin e parandalimit të luftës”.

Për të zgjeruar kapacitetet prodhuese dhe për t’iu përgjigjur kërkesës së forcave të armatosura, Kim urdhëroi gjithashtu ndërtimin e impianteve të reja të municioneve, transmeton Klankosova.tv.

Thirrja për rritjen e prodhimit vjen vetëm një ditë pasi Kim u shfaq duke inspektuar një kantier detar, ku po ndërtohet ajo që Pheniani e përshkruan si një nëndetëse me energji bërthamore prej 8.700 tonësh, e aftë të lëshojë raketa. Fotot e publikuara nga media shtetërore tregojnë Kim Jong Un duke inspektuar anijen në ndërtim, së bashku me zyrtarë të lartë dhe vajzën e tij.

Ishte hera e parë që media shtetërore e Koresë së Veriut publikonte pamje të plota të nëndetëses që nga muaji mars, kur ishin shfaqur vetëm pjesë të saj të poshtme. Sipas Hong Min, studiues i lartë në Institutin për Unifikimin Kombëtar të Koresë në Seul, dizajni i trupit të nëndetëses tregon se ajo është e pajisur me një reaktor bërthamor dhe është pothuajse gati për dalje në det.

Gjatë inspektimit, Kim paralajmëroi se planet e Koresë së Jugut për të ndërtuar nëndetëse me energji bërthamore do të “përkeqësonin paqëndrueshmërinë” në rajon dhe do të përbënin kërcënim për sigurinë kombëtare të Koresë së Veriut.