Kadrijaj: Nuk është kërcënim nëse veteranët protestojnë për të drejtat e tyre

Deputetja e Aleancës për Ardhmërinë e Kosovës Time Kadrijaj tha se nuk mund të konsiderohet si kërcënim nëse veteranët e luftës të Ushtrisë Çlirimtare të Kosovës protestojnë kur u shkelën të drejtat e tyre.

Kadrijaj, e cila ishte edhe vetë ushtare e UÇK-së, theksoi në Edicionin Special në Klan Kosova se është turp nëse tentohet të rritet paga minimale, duke i larguar veteranët e luftës.

“Nuk mund ta konsideroj si kërcënim sepse të gjitha kategoritë, në këtë rast edhe veteranët, kanë të drejtë të mbrojnë të drejtën e tyre ligjore dhe të protestojnë kur u shkelet një e drejtë”.

“Si kërcënim nuk duhet të merren as kur paralajmërohen grevat e sindikatës së arsimit. Kur mendon që t’u kanë shkelur të drejtat ke të drejtë të protestosh edhe si qytetarë edhe si veteranë. Nuk është kërcënim”.

“Dhe nëse ju bëhet një padrejtësi e tillë, të cilën zotëri Kurti po mendon ta bëjë, ta rrisë pagën minimale e prej asaj page minimale t’i largojë veteranët e luftës, ajo është një turp”.

Kryetari i Aleancës për Ardhmërinë e Kosovës, Ramush Haradinaj, e ka paralajmëruar kryeministrin e Kosovës, Albin Kurti, se mund të dalë në rrugë për të mos lejuar hyrjen e tij në qeveri.

“Na i dalim këtij në rrugë edhe i tregojmë, a mund të hyjë ky në zyrë nëse tallet me këto kategori. S’mundesh me i lanë këta pa i përfshi në kriterin e pagës minimale”.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.