Kadrijaj pasi Kurti i quajti nomadë: S’i ka mbetur gjë tjetër veç të shajë

Kryetari i Lëvizjes Vetëvendosje Albin Kurti, i cili mban pozitën e deputetit edhe të kryeministrit në detyrë, ka vazhduar t’i etiketojë deputetët e ish-opozitës.

Duke folur pas dështimit në seancën e 34-të, Kurti i quajti ata “nomadë”, që sipas tij nuk po duan të kenë shtëpi.

“Mund të dëshirosh të kesh shtëpi dhe të mos kesh shtëpi e të jesh refugjat, ta zëmë. Por ata të cilët nuk duan të kenë shtëpi janë nomadë. Ky është thelbi i nomadit. Prandaj këta janë deputetë nomadikë, të cilët nuk dëshirojnë të kenë shtëpi të tyre, sepse shtëpia – Kuvendi, Parlamenti i Republikës – është shtëpia e deputetëve, sidomos opozitarëve”, ka thënë Kurti.

Rreth kësaj deklarate ka reaguar deputetja e AAK-së Time Kadrijaj.

Kadrijaj tha për Klankosova.tv se Kurti pasi i ka okupuar institucionet, s’i ka mbetur gjë tjetër veç të shajë deputetët e Kuvendit.

“Tash kur Kurti ka okupuar institucionet e shtetit dhe ka bllokuar konstituimin e Kuvendit të Kosovës, s’i ka mbetur gjë tjetër veç të etiketojë dhe shajë deputetët e Kuvendit të Kosovës”, deklaroi ajo për Klankosova.tv.

Kujtojmë se Kurti i ka quajtur “hajvana” partitë opozitare në orët e para të 10 shkurtit pasi kishte marrë vesh se dolën të parët.

Nga “hajvana” te “nomadë”, Kurti s’e ndal gjuhën përçmuese ndaj ‘opozitës’

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.