Hyseni: Kam pasur mundësi ta punësojë gruan time përmes nepotizmit, nuk e kam bërë (VIDEO)

Kryetari i Gjilanit, Alban Hyseni, deklaroi se e ka pasur mundësinë që ta punësojë bashkëshorten në sektorin publik, përmes nepotizmit, por siç tha, e ka refuzuar një gjë të tillë dhe u ka thënë që nuk duhet asnjëherë të ndodhë më që ta telefonojnë e t’i kërkohet që gruaja e tij të punësohet diku.

Këtë ai e tha në emisionin Rubikon në Klan Kosova, ku nga opinionistët u pyet lidhur me një postim që Hyseni e kishte bërë në llogarinë e tij në Facebook, si shenjë përkrahjeje për biznesin e gruas së tij, ordinancës fizioterapeutike.

“Sa i përket reklamimit në profilin tim, pra në llogarinë time private e jo në atë që përdoret për njoftim, unë mendoj që është absolutisht e drejtë, sepse nuk ka asgjë të keqe nëse unë reklamoj një biznes familjar, i cili është biznes shumë i vogël, ndoshta edhe për të gjeneruar pagë nuk mund ta bëjë një gjë të tillë, solide të paktën jo”, u shpreh kryetari i Gjilanit, duke shtuar se sivjet në deklarimin e pasurisë ai do të deklarojë që e ka shitur makinën, që i ka marr 10 mijë euro kredi dhe që i ka shtatë mijë euro borxh, para këto që tha se kanë qenë burim i financimit të këtij biznesi privat.