Hoti s’tregon nëse do të ndryshojë Kushtetuta, thotë se karakteri unitar i Kosovës s’preket

Kryeministri Avdullah Hoti ia ka kthyer Emisarit të BE-së për dialogun Miroslav Lajçak i cili tha të premten në Beograd se Kosova duhet ta ndryshojë Kushtetutën në raport me themelimin e Asociacionit të Komunave me Shumicë Serbe.

Hoti tha se karakteri unitar i Republikës së Kosovës është i paprekshëm dhe se nuk do të ketë në asnjë mënyrë pushtet të tretë.

Megjithatë, nuk tregoi saktë nëse do të ketë ndryshime kushtetuese në Kosovë ose jo, ndonëse u pyet disa herë për këtë, njofton Klan Kosova.

Shefi i qeverisë shtoi se marrëveshja finale me Serbinë pikë të parë do ta ketë njohjen reciproke, dhe jo diçka tjetër.

Përpos kësaj, Hoti ka folur edhe për vizitën e delegacionit amerikan të Departamentit të Energjisë së SHBA-ve që ka qëndruar të hënën në Kosovë.

Ai tha se s’ka asgjë konkrete për fillimin e studimit të fizibilitetit për Liqenin e Ujmanit, që duhet ta bëjnë amerikanët, sipas marrëveshjes së 4 shtatorit, veçse premtoi se do të njoftojnë me kohë për veprimet që do të ndërmerren.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.