Haradinaj nuk vjen në interpelancën për gjuajtjen me armë të Dardan Gashit

Është shtyrë interpelanca e kryeministrit Ramush Haradinaj në lidhje me gjuajtje me armë nga Dardan Gashi, zëvendëskryeministër dhe ministër i Diasporës dhe Investimeve Strategjike.

Kjo interpelancë e kryeministrit që është kërkuar nga Grupi Parlamentar i LDK-së ishte paraparë të zhvillohej në seancën e sotme të Kuvendit të Kosovës por që Haradinaj nuk është paraqitur, njofton Klan Kosova.

Se interpelanca e të parit të ekzekutivit nuk do të mbahet sot e kanë konfirmuar për Klan Kosovën edhe nga kabineti i kryeministrit, të cilët thanë se ai do të paraqitet në një seancë tjetër.

Kreu i Grupit Parlamentar të LDK-së, Avdullah Hoti mosparaqitjen e Haradinajt në interpelancën e kërkuar pikërisht nga ky grup parlamentar e ka quajtur papërgjegjësi.

Në seancën e sotme të Kuvendit të Kosovës që është e para për sesionin pranveror dhe vitin 2018 janë diskutuar edhe një sërë projektligjesh si Projekt Kodi i Drejtësisë për të Mitur, Projektligji për parandalimin e konfliktit të interesit në ushtrimin e funksionit publik dhe disa të tjera.

Ndërkohë në kohën e deklarimeve jashtë rendit të ditës, deputeti i LDK-së, Driton Selmanaj ka shprehur shqetësim lidhur me iniciativën e disa deputetëve për të paraqitur një projektligji që amniston deputetët e Kuvendit të Kosovës që kanë hedhur gaz lotsjellës.

Selmanaj ka thënë se Grupi Parlamentar i LDK-së këtë e konsideron si papërgjegjësi ndaj institucioneve të drejtësisë.

Ai poashtu e ka cilësuar si interes personal të disa deputetëve duke thënë se një iniciativë e tillë është e papranueshme për Grupin Parlamentar të LDK-së.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.