Haradinaj kërkon reflektim nga Qeveria - Klan Kosova


Na ndiqni në:


Get it on Google Play Download on the App Store

Haradinaj kërkon reflektim nga Qeveria

NULL NULL
15/10/2015

Lideri i Aleancës për Ardhmërinë e Kosovës, Ramush Haradinaj, ka thënë se Qeveria e Kosovës s’mund të marrë vendime në dëm të vendit e të kërkojë normalitet në institucione dhe ta ketë miratimin e opozitës.

Sipas tij insistimi që Kuvendi të vazhdojë punën, nuk ka më kuptim dhe e ka krijuar një klimë shumë të papërshtatshme.

“Është i pakuptimtë ky insistim që me çdo kusht të mbahet mbledhja e Kuvendit, kur në mungesë të reflektimit ndaj kërkesave tona është krijuar një klimë e papërshtatshme. Vetë ky insistim, është provokim, papjekuri politike dhe mungesë lidershipi shtetëror. Udhëheqësit politikë të këtij vendi nuk mund të sillen sikur çdo gjë është normale”, është shprehur Haradinaj, njofton zyra për media e AAK-së.

“Ky vend ka ardhur në një situatë kur duhet t’u japë zgjidhje dy marrëveshjeve që e kanë sjellë vendin këtu ku është, e mëpastaj t’i rikthehemi normalitetit dhe jetës institucionale pozitë-opozitë.

Klima e krijuar kërkon reflektim dhe përgjegjësi politike”.

Haradinaj po ashtu ka kërkuar nga organet e drejtësisë që t’i lirojnë aktivistët e arrestuar të opozitës. Ai mendon se zgjidhja e kësaj situate s’është në duar e policisë.

‘Organet e rendit e drejtësisë duhet që urgjentisht t’i lirojnë aktivistët politikë të AAK-së dhe të opozitës në përgjithësi. Situata është tepër serioze dhe nuk mund të zgjidhet me mjete policore e as me këmbëngulësinë e pakuptueshme të pushtetarëve për t’i ikur përgjegjësisë për dëmin e shkaktuar me këto marrëveshje”.