Grupet e ndihmës thonë se situata është e paimagjinueshme në spitalin e Gazës

Zyrtarët ndërkombëtarë thonë se e gjithë popullsia e Gazës prej 2.3 milionë banorësh vuan nga pasiguria ushqimore dhe se zia e bukës është e pashmangshme në veriun e goditur rëndë.

Grupet e ndihmës që vizituan një spital të mbushur plot në Gaza përshkruan një situatë “të paimagjinueshme” në të cilën plagë të mëdha të hapura mbetën të patrajtuara, shkruan euronews, transmeton klankosova.tv.

Një ekip mjekësor urgjent i organizuar nga tre grupe ndihme kaloi dy javë duke kryer operacione dhe kujdes të tjerë në Spitalin Evropian të Gazës pranë Khan Younis. Qyteti jugor ka pasur luftime të ashpra midis forcave izraelite dhe militantëve palestinezë që nga fillimi i vitit.

Spitali është zgjeruar në një mijë shtretër nga kapaciteti i tij fillestar prej 200 për të akomoduar pacientë nga Spitali Nasser, spitali kryesor në Khan Younis, të cilin forcat izraelite bastisën muajin e kaluar.

Rreth 22 mijë njerëz janë strehuar gjithashtu në Spitalin Evropian të Gazës.

Kirurgët vizitues “raportuan plagë të mëdha të hapura të infektuara te pacientët dhe se duhej të administronin furnizime ushqimore urgjente për pacientët pasi mungesa e ushqimit po rrezikonte trajtimin e pacientit”.

Në një deklaratë të lëshuar të hënën, ekipi tha se punonjësit e kujdesit shëndetësor ishin detyruar të evakuoheshin ose nuk ishin në gjendje të hynin në spital.