Ish-punëtorët e Fabrikës së Tubave grevë në Kuvendin Komunal të Ferizajt

Punëtorët e Fabrikës së Tubave të Ferizajt, e kanë zhvendosur grevën e tyre nga sheshi i kryeqytetit, në sallën e Kuvendit Komunal ku po qëndronin edhe në orët e vona të së martës.

Në emisionin Ora e Fundit në Klan Kosova, në “Kosova Direct”, grevistët që kishin zënë ulëset e asambleistëve të Kuvendit të Ferizajt, thanë se do të rrinë aty derisa të takohen me kryeministrin Isa Mustafa dhe Kryetarin e Kuvendit, Kadri Veseli.

Ali Azemi, kryetar i Sindikatës së Punëtorëve të Fabrikës së Gypave të Ferizajt, thotë se Qeveria e Kosovës, nga privatizimi i kësaj fabrike, u ka borxh një shumë të madhe parash 912 punëtorëve që dikur punonin në këtë fabrikë dhe kërkon që paratë që u takojnë, t’ju jepen nga qeveria si iu kishte premtuar.

“Pushtetarët tanë nuk po i kryejnë obligimet e veta ligjore dhe kushtetuese. Ata e kanë për detyrë ta shlyejnë borxhin prej 25,649000 euro. Qeveritë e kaluara janë zëvendësuar me qeverinë e Isa Mustafës. Ne e kemi njoftuar kryeministrin aktual për problemin që kemi me borxhin dhe që 912 punëtorëve të fabrikës së tubave u takojnë paratë e tyre”, ka thënë ai në një intervistë për emisionin Ora e fundit.

E tëra që po kërkojnë grevistët e fabrikës së tubave, është një takim me të parin e qeverisë dhe të kuvendit, për t’iu kërkuar atyre që të reflektojnë.

“Ne po kërkojmë takim me kryeministrin dhe kryekuvendarin Kadri Veseli. Veseli e ka ndier veten përgjegjës për shlyerjen e borxhit ndaj nesh. Ne i kemi përdorur të gjitha format sindikale që të arrijmë qëllimin tonë. Kemi bërë 131 protesta dhe 247 ditë grevë”

“Në sallën e Kuvendit do të qëndrojmë derisa të realizohet një takim me kryeministrin dhe Veselin. Do të shohim se si do të reflektojnë ata”.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.