Gjykata liron lokalin e uzurpuar në Prishtinë (VIDEO)

Me urdhër të Gjykatës Themelore të Prishtinës një lokal në qendër të kryeqytetit u zbraz i tëri.

Ai është njëri nga katër objektet që janë në kontest gjyqësor mes palëve që konsiderojnë se janë pronare të tyre, dhe atyre që i shfrytëzojnë për biznes.

Këta të fundit në fund të 2017-ës kishin marrë leje nga Ndërmarrja Publike Banesore në kryeqytet për shfrytëzim të pronave publike. Por, NPB e kishte tërhequr kontratën vetëm pak muaj më vonë, pasi konsideronte se kioskat ishin private.

Mirëpo pronarët e bizneseve nuk ishin tërhequr, teksa për tri vjet nuk i paguan qera askujt, gjë për të cilën ankohet avokati i palës paditëse, Shefqet Halimi.

“Uzurpuesit e lokalit deri më këtë çast nuk kanë shprehur gatishmëri as me lidhë kontratë me qiraxhiun legal, as me e lëshu lokalin, por as me e pagu qiranë”, thotë ai, njofton Klan Kosova.

Njëri nga avokatët e bizneseve, Skender Musa, thotë se klienti i tij është i gatshëm të paguajë qera, por vetëm ndaj atij që ia cakton gjykata.

“Fakti se pala nuk pranon të paguajë qiranë direkt te personi privat është se dyshon se kjo pronë është bartur në mënyrë të paligjshme”, deklaron ai.

Musa vlerëson se këto prona janë publike, pasi gjenden në perimetrin e oborrit të shkollës “Faik Konica”.

Sipas palëve, fillet e kontestit janë te kontrata e dhënë nga Ndërmarrja Publike Banesore.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.