Gjobë ndaj shoferit që qarkullonte me drita rotative në Prishtinë

Njësiti i Trafikut të Kryeqytetit ka gjobitur një shofer, i cili po qarkullonte me veturën në të cilën kishte vendosur pajisje ndriçuese (drita rotative) në kundërshtim me dispozitat ligjore në fuqi.

Gjatë kontrollit në trafik është konstatuar se pajisjet e ndriçimit të vendosura në automjet nuk ishin të lejuara për përdorim, ndërsa shoferi me to kishte dalë në qarkullim, duke shkelur kështu rregullat e trafikut rrugor, transmeton Klankosova.tv.

Policia ka bërë të ditur se ndaj drejtuesit të mjetit, konform legjislacionit në fuqi, është shqiptuar gjoba përkatëse, si dhe masa mbrojtëse e ndalimit të patentë-shoferit për një periudhë prej tre muajsh.