Giresse për ndeshjen ndaj Zvicrës: Është e rrallë që ekipi mysafir të luajë në praninë e shumë tifozëve të vet

Trajneri i ri i kombëtares së Kosovës, Alain Giresse ka folur në lidhje me paraqitjen ndaj Burkina Fasos dhe përballjen ndaj Zvicrës.

Giresse u shpreh i habitur me numrin e tifozëve kosovarë që do të jenë të pranishëm, njofton Klankosova.tv.

Tutje, francezi ekskluzivisht në Sports Show të Klan Kosovës, potencoi se do të jetë krejt tjetër ekip ndaj Zvicrës, në krahasim me ata që kanë luajtur ndaj Burkina Fasos.

“Do të jetë shumë e rëndësishme të ketë tifozë kosovar në Cyrih. Është e rrallë që një ekip mysafir të luajë në praninë e kaq shumë tifozëve të vet, shpresoj që do t’ju ofrojmë kënaqësi tifozëve dhe Kosova të luajë një ndeshje të bukur. Të gjithë lojtarët janë të gatshëm të luajnë. Nuk kemi lëndime pas ndeshjes me Burkina Fason”, është shprehur Giresse.

“Por, siç e kam thënë të gjithë futbollistët do të përfshihen në këto dy ndeshje miqësore, kishim një ekip ndaj Burkina Fasos dhe do të jetë një ekip tjetër ndaj Zvicrës, pastaj shpresoj se do të arrijmë rezultatin më të mirë të mundshëm, nuk mund ta di para kohe nëse do të fitojmë apo do të bëjmë një ndeshje të dobët, por do të bëjmë gjithçka për t’u paraqitur mirë”.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.