Firmoset statuti i Muzeut të Kosovës NULL NULL 24.12.2018 11:14 24.12.2018 11:14 Ministri i Kulturës, Rinisë dhe Sportit Kujtim Gashi, ka nënshkruar sot statutin për Muzeun e Kosovës. Në adresimin e tij për media, Kujtim Gashi ka thënë se nënshkrimi i statutit e lartëson këtë institucion, e njëherësh është zotuar se vitin e ardhshëm do ta ketë në agjendë përpilimin e Ligjit për Muze, njofton Klan Kosova. “Ky statut për herë të parë e mundëson digjitalizimin e fondit muzeor, ngritjen e kapaciteteve dhe shërbimeve muzeore, e ngritë muzeun në institucion të lartë shtetëror”. Kurse, ushtruesja e detyrës së drejtores së muzeut, Vjolla Aliu, ka thënë se nënshkrimi i statutit është dhurata më e mirë që mund t’i bëhet një institucioni. ”Nënshkrimi i statutit të muzeut është akt ligjor që funksionalizon dhe avancon punën e Muzeut të Kosovës”. Ndërsa kryetari i Këshillit Drejtues të Muzeut, Selim Bezeraj, tha se për këtë grup punues prioritet ka qenë skalitja e gjendjes së muzeut dhe hartimi i statutit. Përndryshe, statuti i fundit i Muzeut ishte nënshkruar para 40 vjetësh, ndërkaq, vitin e ardhshëm, Muzeu i Kosovës shënon 70 vjetorin e themelimit, njofton Klan Kosova.
