Drita nxjerr barazim ndaj Plzenit

Skuadra gjilanase Drita ka barazuar pa gola me skuadrën çeke, Viktoria Plzen.

Ndeshja e parë e raundit të dytë kualifikues në Ligën e Konferencës u dominua nga mysafirët, gjë që e bëri Dritën të vuajë shumë.

Në krejt ndeshjen, ishte portieri i Dritës Florjan Smakiqi, ai që u shqua për pritje të rëndësishme.

Dhe kur po luheshin minutat e fundit të ndeshjes, Drita e pati një mundësi të mrekullueshme për të shënuar, mirëpo Albert Dabiqaj i gjendur i vetëm përballë portierit kundërshtar, huqi kuadratin dhe gjuajti jashtë portës.

Vlen të theksohet se skuadra çeke vitin e kaluar luajti në fazën e grupeve të Ligës së Kampionëve, ku për kundërshtarë kishte të mëdhenjtë e Evropës, Interin, Bayernin e Barcelonën.

Ndeshja e kthimit do të luhet në “Fadil Vokrri” më 3 gusht.