Cristiano Ronaldo drejt Liverpoolit?

Ish-sulmuesi i Aston Villas, Gabriel Agbonlahor beson se Cristiano Ronaldo nuk do të refuzonte mundësinë për t’u bashkuar me rivalët e Manchester United, Liverpool, në rast se skuadra e Jurgen Klopp do të bënte një ofertë për të nënshkruar me yllin portugez.

Ronaldo kohët e fundit i kërkoi Manchester Unitedit që ta lejonte të largohej nga klubi pasi ata nuk arritën të siguronin një vend për në grupet e Ligës së Kampionëve për sezonin e ardhshëm, shkruan Marca, transmeton Klankosova.tv.

“Cristiano Ronaldo do t’i bashkohej Liverpoolit këtë verë, nëse do të mundej”, tha Agbonlahor për talkSPORT.

“Ata janë rivalë të mëdhenj të Man United, por bëhet fjalë për Ronaldon”.

“Ai do të shkojë kudo që mund të luajë ende futboll në Champions League, të shtojë rekordin e tij dhe të fitojë tituj. Nuk mendoj se Ronaldo ka ndonjë besnikëri ndaj United, Real Madrid apo Juventus”.

Ronaldo nuk udhëtoi me ekipin për turneun e tyre parasezonal dhe pati një takim me klubin, ku thuhet se u kërkoi atyre të përmendnin çmimin e tyre.

Bayern Munich, Atletico Madrid dhe Sporting CP janë shfaqur të gjithë si kandidatë të mundshëm për të nënshkruar me yllin 37-vjeçar përpara sezonit 2022/23.

Megjithatë, trajneri i ri i Manchester United, Erik ten Hag, e ka bërë të qartë se Ronaldo është pjesë e planeve të tij, duke theksuar se portugezi nuk është në shitje.