Bideni po e shqyrton kërkesën e Australisë për të hequr ndjekjen penale ndaj Assange

Presidenti amerikan, Joe Biden, tha të mërkurën se po e shqyrton një kërkesë nga Australia për të hequr dorë nga shtytja e ShBA-së për një dekadë për të ndjekur penalisht themeluesin e Wikileaks, Julian Assange për botimin e një grumbulli dokumentesh të klasifikuara amerikane.

Për vite me radhë, Australia i ka bërë thirrje Shteteve të Bashkuara që të heqin dorë nga ndjekja penale kundër Assange, një shtetas australian i cili ka luftuar përpjekjet e ShBA-së për ekstradim nga burgu në Mbretërinë e Bashkuar. I pyetur në lidhje me kërkesën të mërkurën, teksa priti kryeministrin japonez Fumio Kishida për një vizitë zyrtare, Biden tha, “Po e shqyrtojmë”.

Assange është paditur për 17 akuza për spiunazh dhe një akuzë për keqpërdorim kompjuteri për publikimin në uebsajtin e tij të një grumbulli dokumentesh të klasifikuara amerikane pothuajse 15 vjet më parë. Prokurorët amerikanë pretendojnë se Assange, 52 vjeç, inkurajoi dhe ndihmoi analisten e inteligjencës së Ushtrisë Amerikane, Chelsea Manning, të vidhte kabllogramet diplomatike dhe dosjet ushtarake që publikoi WikiLeaks, duke vënë në rrezik jetë.