Berisha: Specialja nuk e gjykon luftën e Kosovës

Besnik Berisha, këshilltari i kryeministrit Isa Mustafa, i ftuar në emisionin Zona B, duke folur për formimin e Gjykatës Speciale, ka thënë se ky institucion gjyqësopr do t’i gjykojë vetëm individët dhe asnjëherë Kosovën si shtet.

“Kosova nuk do të gjykohet asnjëherë si shtet, as UÇK-ja si strukturë ushtarake. Nuk do të gjykohet as lufta e Kosovës për çlirim. Por vetëm persona për të cilët dyshohet se kanë kryer krime që bien ndesh me konventat ndërkombëtare”.

Berisha gjithashtu ka thënë se Kosova e ka të detyrueshëm formimin e Gjykatës Speciale dhe se kjo nuk e bën Kosovën kryese të krimeve të luftës.

“Pranimi i Gjykatës Speciale, nuk e bën Kosovën kriminele. Ne kemi një detyrim ligjor dhe kushtetues, nuk ka më hapësirë për zgjedhje, është e domosdoshme dhe e detyrueshme”.

Ai gjithashtu ka konstatuar se deputetët janë të lirë të bëjnë zgjedhjen e tyre. Ata mund të votojnë sido që e konsiderojnë të drejtë.

“Deputetët nuk do t’i kushtëzojë askush në verdiktin e tyre pro ose kundër gjykatës. Nuk sanksionohet askush që nuk voton dhe nuk shpërblehet askush që voton”.

Në emision u fol edhe për ngjarjet në Kumanovë, ku i ftuari Besnik Berisha demantoi deklaratat e mëhershme të Haxhi Shalës, Kryetari i Komisionit për Mbikëqyrjen e AKI-së. Shala në emisionin Info Magazine, kishte thënë se kryeministri kishte informata të cilat delegonin në ngjarjen e Kumanovës, kurse Berisha tha se nuk kishte informacione që do të mund të shërbenin si preventivë për zhvillimet në Kumanovë.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.