Babai i Messit po kalon shqetësim shëndetësor, familja del me komunikatë zyrtare

Familja Messi njofton se Jorge Messi (babai i Leo Messi) aktualisht po përballet me një shqetësim shëndetësor.

Në këtë moment, ai është nën mbikëqyrje mjekësore, duke u rikuperuar dhe duke shënuar përparim pozitiv në trajtimin e gjendjes që po kalon.

“Në dritën e raportimeve, thashethemeve dhe spekulimeve që kanë qarkulluar në orët e fundit, familja dëshiron të shprehë shqetësimin e saj të thellë për mungesën e ndjeshmërisë, respektit dhe diskrecionit me të cilën disa persona kanë trajtuar një çështje rreptësisht private familjare”, shkruan Fabrizio Romano në Facebook.

Familja dëshiron gjithashtu të sqarojë se vetëm familja e ngushtë e Jorge Messit ka informacione të sakta dhe reale lidhur me gjendjen e tij. Prandaj, çdo deklaratë apo informacion që nuk vjen drejtpërdrejt nga familja dhe kanalet e saj zyrtare nuk duhet të konsiderohet i vlefshëm apo i vërtetë.

“Në momente si këto, kërkojmë përgjegjësi, maturi dhe humanizëm. Shëndeti i një personi dhe qetësia shpirtërore e të afërmve të tij nuk duhet të jenë objekt spekulimesh apo vëmendjeje të papërgjegjshme mediatike.Ne vlerësojmë sinqerisht shprehjet e dashurisë, respektit dhe shqetësimit që kemi marrë dhe kërkojmë që privatësia, konfidencialiteti dhe hapësira personale e Jorge Messit, si dhe e gjithë familjes së tij, të respektohen gjatë këtij procesi.Çdo përditësim i rëndësishëm do të komunikohet në kohën e duhur nga familja dhe përmes kanaleve përkatëse”, shkruhet në komunikatën e familjes Messi.