Autobusi dhe makina përplasen dhe përfundojnë në Lanë, lëndohen pesë persona

Një autobus i mbushur me pasagjerë i linjës së Unazës dhe një makinë kanë përfunduar në lumin e Lanës në Tiranë pasi janë përplasur me njëra-tjetrën.

Autobusi ka përfunduar mbi makinën e përmbysur në lumë. Paraprakisht dyshohet që shkak i kësaj ngjarjeje të jetë një manovër e gabuar e shoferit të makinës për parakalim.

Ngjarja ndodhi rreth orës 20:00 të pasdites së kësaj të premteje në zonën e njohur si “Kinema Agimi” në kryeqytet.

Nga kjo ngjarje mbetën të lënduar pesë persona, dy të rinjtë të cilët ndodheshin në makinën e përfshirë në aksident, shoferi dhe fatorinoja i autobusit dhe një qytetare që ndodhej në autobus.

Sipas policisë ata ndodhen jashtë rrezikut për jetën.

Në vendin e ngjarjes kanë shkuar zjarrfikësit dhe policia. Po ashtu, atje shkoi edhe kryebashkiaku i Tiranës, Erion Veliaj./tvklan/