Asociacioni i njëanshëm, i papranueshëm nga pala kosovare

Paralajmërimi për themelimin e njëanshëm të Asociacionit të Komunave Serbe nga ana e serbëve të veriut është i papranueshëm për Qeverinë dhe për opozitën kosovare. Një veprim i tillë, sipas Qeverisë, do të ishte humbje kohe për serbët dhe njëkohësisht edhe bllokim në procesin integrues

Politikanët serbë të veriut të Kosovës janë duke i bashkërenduar veprimet me Qeverinë në Beograd për ta themeluar njëanshëm Asociacionin e Komunave me shumicë Serbe, si shenjë kundërveprim ndaj zvarritjes së formimit të tij nga ana e Qeverisë së Kosovës.

Madje, sipas burimeve nga veriu, serbët janë të gatshëm të veprojnë jashtë Prishtinës, duke mos pritur deri në “pafundësi”.

Por, Qeveria e Kosovës, subjektet opozitare dhe analistët politikë vlerësojnë se funksionalizimi i njëanshëm i Asociacionit do të bënte që institucionet e Kosovës të mos e pranojnë atë si legjitim dhe se serbët në Kosovë nuk do të kishin kurrfarë përfitimi nga formimi i këtij Asociacioni, shkruan sot gazeta “Zëri”.

Ata madje thonë se mosrespektimi i marrëveshjeve të Brukselit nga ana e Serbisë do të bënte që kësaj të fundit t’i bllokohet anëtarësimi në Bashkimin Evropian.

Ministrja për Dialog, Edita Tahiri, ka thënë se vetëshpallja e Asociacionit së Komunave është një hap i pamundur, ndërsa ka shtuar se Serbia pa i zbatuar marrëveshjet me Kosovën do ta ketë të pamundur anëtarësimin në Bashkimin Evropian.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.