Përplasje e re mes UEFA-s dhe FIFA-s, Infantino humb besimin e futbollit evropian

Përplasja mes UEFA-s dhe FIFA-s është thelluar pasi organi qeverisës i futbollit evropian deklaroi se presidenti i FIFA-s, Gianni Infantino, ka humbur besimin e tyre pas dështimit të projektit që synonte të lejonte investime private në garat e FIFA-s.

Projekti parashihte krijimin e filialit komercial FIFA Forward Enterprise (FFE), i cili do të menaxhonte kompeticione si Kupa e Botës dhe Botërori i Klubeve, transmeton Klankosova.tv.

FIFA synonte të siguronte deri në 4.2 miliardë dollarë, ndërsa secila prej 211 federatave anëtare do të përfitonte 20 milionë dollarë në vitin 2027.

Megjithatë, pas kundërshtimeve të forta nga UEFA dhe konfederatat e tjera, projekti u tërhoq. UEFA kishte paralajmëruar edhe bojkotimin e garave të FIFA-s në rast se plani do të miratohej.

Në reagimin e saj, UEFA akuzoi Infantinon se ka shkelur premtimet për transparencë dhe e cilësoi projektin si një “marrëveshje të fshehtë dhe pa transparencë”.

Sipas saj, rezervat financiare të FIFA-s, që tejkalojnë 5 miliardë dollarë, e bënin të panevojshëm një model të tillë privatizimi.

UEFA bëri të ditur se do të bashkëpunojë me federatat anëtare për të analizuar të gjithë procesin, ndërsa e cilësoi tërheqjen e projektit si “një fitore për të gjithë futbollin”.

Ky zhvillim konsiderohet një goditje e rëndë për Gianni Infantinon, i cili synon një mandat të tretë në krye të FIFA-s.