Djali i Van Persie zgjedh Marokun, refuzon Holandën

Djali i sulmuesit legjendar të Holandës, Robin van Persie, 19-vjeçari Shaqueel van Persie, ka marrë një vendim të rëndësishëm në fillim të karrierës së tij ndërkombëtare.

Sipas Zone FRMF, sulmuesi i ri i Feyenoord ka zgjedhur të përfaqësojë ekipin kombëtar të Marokut, duke refuzuar mundësinë për të luajtur për Portokallinjtë.

Shaqueel kishte të drejtë të bënte këtë zgjedhje falë nënës së tij, Bouchra van Persie, e cila ka rrënjë marokene. Pavarësisht se më parë është thirrur për ekipet e të rinjve holandezë, sulmuesi ka vendosur të përfaqësojë “Atlas Lions” në nivelin e seniorëve.

Babai i tij i famshëm, Robin van Persie, e mbështet plotësisht këtë veprim.

Ish-ylli i Arsenalit dhe Manchester United më parë ka deklaruar publikisht se nuk do t’i bënte kurrë presion të birit dhe do t’i jepte atij liri të plotë në zgjedhjen e kombësisë së tij si futbollist. Duket se këmbëngulja e federatës marokene të futbollit – dhe thirrja e rrënjëve të tij – kanë qenë vendimtare për talentin e ri.

Vlen të përmendet se këtë sezon Shaqueel van Persie ka luajtur 7 ndeshje për skuadrën senior të Feyenoord, duke shënuar 3 gola dhe duke dhënë 3 asiste. /Klankosova.tv