Simeone kërkon Lewandowskin te Atletico Madridi

Diego Simeone po e ndjek nga afër situatën e Robert Lewandowskit te Barcelona, me synimin për ta sjellë sulmuesin te Atletico Madridi si lojtar të lirë gjatë merkatos së ardhshme.

Kontrata aktuale e Lewandowskit me Barcelonën skadon në fund të këtij sezoni.

Raportimet nga Spanja tregojnë se klubi katalanas nuk do t’i ofrojë sulmuesit një kontratë të re dhe është duke kërkuar një pasues për rolin e numrit 9. Atletico Madrid ka përfituar më parë nga situata të ngjashme, duke mirëpritur lojtarë si Luis Suarez dhe David Villa nga Barcelona pasi kontratat e tyre kishin përfunduar.

Edhe pse Milani ka shprehur interes për ta marrë Lewandowskin, burime të brendshme besojnë se gjasat që ai t’i bashkohet Atletico Madridit janë dukshëm më të mëdha.

Sulmuesi me përvojë ka marrë gjithashtu oferta nga Arabia Saudite dhe Shtetet e Bashkuara, transmeton Klankosova.tv.

Megjithatë, prioritet i tij kryesor mbetet të qëndrojë te Barcelona, edhe nëse kjo do të thotë të pranojë një rol më të kufizuar në skuadër dhe një pagë më të ulët.

Lewandowski është i gatshëm të presë për një vendim përfundimtar nga drejtuesit e Barcelonës, të cilët thuhet se janë të shqetësuar për shpeshtësinë e dëmtimeve të tij të fundit.