Haziri: Nuk e kemi problem emrin e Haxhiut, i kemi problem kushtëzimet politike (VIDEO)

Nënkryetari i LDK-së, Lutfi Haziri, ka thënë se partia në të cilën ai bënë pjesë nuk e ka problem emrin e Albulena Haxhiut, si kandidate për kryetare të Kuvendit, por raportin që është ndërtuar nga Lëvizja Vetëvendosje.

Në emisionin DPT Fidani në Klan Kosova, ai ka theksuar se Lëvizja Vetëvendosje po mundohet që mendësinë e saj të operimit që e ka për brenda ta shpërfaqë edhe në Kuvendin e Kosovës.

“Qëndrimi politik i kryesisë së LDK-së është që e drejta e fituar për propozim VV-së i takon dhe ata kanë të drejtë të propozojnë kë të duan. Emri i Albulena Haxhiut nuk është problem për LDK-në, ata e kanë të drejtën e vet”, u shpreh Haziri.

“Ne nuk i japim të drejt vetes me ia diktu emrin, është e drejta e tyre të mendojnë se me kë do të kandidojnë. Por të drejtën tonë për ta votuar e ndajmë, kjo është politike, nuk ka të bëjë me emrin e Albulena Haxhiut.  Ne nuk e kemi problem si parti emrin e Albulena Haxhiut, ne si parti e kemi problem raportin që është ndërtuar, mendësia politike, kushtëzimet politike”.

“Ky nivel ku ka rënë Republika e Kosovës dhe mënyra se si po udhëhiqet, dhe është çështje që sot e dikton edhe lideri i LVV-së. Ai ka të drejtë brenda partisë së vet të punojë edhe me angazhime çfarëdo që ata vlerësojnë dhe e pranojnë, por nuk kanë të drejtë partitë që janë të përfaqësuara në Kuvend  të imponojnë mendësinë e vet”, ka thënë Haziri. /Klankosova.tv

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.