Iran: Arrestime masive dhe ekzekutime pas dyshimeve për lidhje me inteligjencën izraelite

Autoritetet iraniane kanë kryer një valë arrestimesh dhe disa ekzekutime ndaj personave të dyshuar për lidhje me shërbimet e inteligjencës izraelite, në vazhdën e luftës së fundit mes dy vendeve.

Kjo ndodh pas asaj që zyrtarët e përshkruajnë si një infiltrim të shërbimeve të sigurisë iraniane nga agjentë izraelitë.

Autoritetet dyshojnë se informacioni i dhënë Izraelit luajti rol në një sërë vrasjesh me profil të lartë gjatë konfliktit, përfshirë eliminimin e komandantëve të lartë të Gardës Revolucionare Islamike (IRGC) dhe shkencëtarëve bërthamorë – vrasje që Irani ia atribuon operativëve të agjencisë izraelite të inteligjencës, Mossad, që vepronin brenda vendit.

Të tronditura nga saktësia dhe shkalla e këtyre vrasjeve, autoritetet iraniane kanë nisur të synojnë këdo që dyshohet se bashkëpunon me inteligjencën e huaj, duke deklaruar se kjo bëhet për ruajtjen e sigurisë kombëtare.

Megjithatë, shumëkush druhet se këto veprime po përdoren edhe për të shtypur kundërshtimin dhe për të forcuar kontrollin mbi popullsinë.

Gjatë konfliktit 12-ditor, autoritetet iraniane ekzekutuan tre persona të akuzuar për spiunazh në favor të Izraelit. Të mërkurën – vetëm një ditë pas armëpushimit – u ekzekutuan edhe tre të tjerë me akuza të ngjashme.

Që atëherë, zyrtarët kanë njoftuar për arrestimin e qindra të dyshuarve në të gjithë vendin për spiunazh. Televizioni shtetëror ka transmetuar rrëfime të disa të ndaluarve, që pretendohet se pranojnë bashkëpunimin me inteligjencën izraelite.

Grupet e të drejtave të njeriut dhe aktivistët kanë shprehur shqetësime për zhvillimet e fundit, duke përmendur praktikën e gjatë të Iranit për rrëfime të detyruara dhe gjykime të padrejta. Ekziston frika se mund të pasojnë edhe më shumë ekzekutime.

Ministria iraniane e Inteligjencës thotë se është angazhuar në një “luftë të pamëshirshme” kundër asaj që e quan rrjetet e inteligjencës perëndimore dhe izraelite – përfshirë CIA-n, Mossad-in dhe MI6-n.

Sipas agjencisë Fars, e cila është e lidhur me Gardën Revolucionare, që nga fillimi i sulmeve izraelite ndaj Iranit më 13 qershor, “rrjeti i spiunazhit izraelit është bërë jashtëzakonisht aktiv brenda vendit”. Fars raportoi se gjatë 12 ditëve, forcat iraniane të sigurisë kanë arrestuar “më shumë se 700 persona të lidhur me këtë rrjet”.

Qytetarë iranianë i thanë BBC Persian se kanë marrë mesazhe paralajmëruese nga Ministria e Inteligjencës, duke i informuar se numrat e tyre të telefonit janë shfaqur në faqe të mediave sociale të lidhura me Izraelin. Ata janë udhëzuar të largohen nga ato faqe ose përndryshe do të përballen me ndjekje penale.

Qeveria iraniane ka rritur gjithashtu presionin ndaj gazetarëve që punojnë për media në gjuhën persiane jashtë vendit, përfshirë BBC Persian, Iran International (me seli në Londër) dhe Manoto TV.

Sipas Iran International, Garda Revolucionare ka ndaluar nënën, babain dhe vëllain e një prej prezantueseve të saj në Teheran, në përpjekje për ta detyruar që ajo të jepte dorëheqje për shkak të mbulimit që televizioni i saj i ka bërë konfliktit Iran-Izrael. Prezantuesja ka marrë një telefonatë nga babai i saj – nën trysninë e agjentëve të sigurisë – duke e nxitur të largohej nga televizioni dhe duke e paralajmëruar për pasoja të tjera.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.