Qeveria dhe opozita në Venezuelë pajtohen për zgjedhje më 2024

Qeveria e Venezuelës dhe Platforma Unitare e opozitës kanë rënë dakord për kushtet elektorale për zgjedhjet presidenciale që do të mbahen në gjysmën e dytë të vitit të ardhshëm.

Marrëveshja u nënshkrua nga të dyja palët të martën në Bridgetown, Barbados, që vjen dy vjet pasi negociatat e ndërmjetësuara nga Norvegjia filluan fillimisht dhe një vit pasi ajo përpjekje u pezullua, raporton UPI, transmeton Klankosova.tv.

“Kjo rrugë nuk ka qenë e lehtë, por falë ndërgjegjes dhe forcës së popullit tonë heroik, ne po ecim pak nga pak përpara”, tha në një deklaratë presidenti autoritar i Venezuelës, Nicolas Maduro.

“Me nënshkrimin e këtyre marrëveshjeve po hedhim hapin e parë drejt heqjes së plotë të të gjitha sanksioneve, rimëkëmbjes progresive të mirëqenies sociale, rritjes ekonomike dhe konsolidimit të paqes dhe demokracisë, në kuadrin e sovranitetit dhe pavarësisë së plotë”, deklaroi ai.